Inson bilimi, ma’naviyati, kasb-xunari bilan go’zaldir, deya ta’kidlagan ahli donish. Xalqimizda ham o’z farzandlarini zukko, ta’lim-tarbiyali, hunarli qilib voyaga yetkazish azaliy orzu-maqsad bo’lgan. SHu bois ilm-hunar o’rgatuvchi muallim, murabbiylarga katta hurmat-ehtirom bilan qaralgan.
Ana shunday sharafli va mas’uliyatli kasbga o’z umrini bag’ishlagan, oliy dargoh deb atalmish ma’rifatli maskanida ko’p yillar davomida xizmat qilib kelayotgan Olim Zokirovni hamkasblari, oilasi, yaqinlari, ko’plab shogirdlari chuqur hurmat qilishadi va ardoqlaydi.
Zero, o’qituvchilikni, yosh avlod ta’lim-tarbiyasini o’ta mas’uliyatli vazifa deb bilgan fidoiy inson ana shunday e’zozga hurmatga munosibdir.
Olimjon Zokirov 1924 yili Qirg’iziston Respublikasining O’sh shahrida dehqon oilasida tavallud topdi. U 1931 yilda O’sh shaxridagi o’rta maktabning 1 sinfiga o’qishga qabul qilinib 1940 yilda uni 9 sinfini tamomladi. 1940 yilning sentyabrida O’sh shahrida tashkil etilgan o’qituvchilar tayyorlash maktabiga o’qishga kirib, uni 1942 yilning iyunida imtiyozli diplom bilan tugatib, yullanma bilan A. Navoiy nomli o’rta maktabda fizika va matematika fanlari o’qituvchisi bo’lib ishga kirdi.